बाढी प्रभावित क्षेत्रबाट हवाई मार्गबाट उद्धार गरिएकाको सङ्ख्या ३५९६ पुगेको छ। राष्ट्रिय विपद् जोखिम न्यूनीकरण तथा व्यवस्थापन प्राधिकरणका अनुसार उद्धार गरिएकामध्ये २५२ विदेशी नागरिक र ३३४४ नेपाली छन्। रासुवा, नुवाकोट, धादिङ, गोरखा र तनहुँ सबैभन्दा बढी प्रभावित जिल्ला हुन्।
सोमबार जारी सूचनामा प्राधिकरणले हेलिकोप्टरको माग अत्यधिक बढेको बताएको छ। कम प्रभावित, अप्रभावित वा उच्च भागमा सुरक्षित रहेका व्यक्तिहरूले समेत हेलिकोप्टरको माग गर्दा उद्धार स्रोतमा चाप परेको प्राधिकरणको भनाइ छ। वैकल्पिक सडक मार्ग खुल्दै गएकाले आपत्कालीन उद्धार नचाहिनेले सकेसम्म सडक प्रयोग गर्न पनि अनुरोध गरिएको छ।
खुलेका वैकल्पिक सडक मार्ग
धादिङलाई पृथ्वी राजमार्गसँग जोड्ने मार्ग सञ्चालनमा आएको छ। धादिङबेसी, परेवाटार, नेपालटार, गजुरीटार, पिपलटार, आदमटार, बेलिनीटार र केउरिनीटार हुँदै ह्याम्प्लेट रेस्टुरेन्ट नजिकको मस्तारसम्म यो मार्ग चलेको प्राधिकरणले जनाएको छ।
त्यस्तै, रासुवा जानका लागि चारपांग्रे साना सवारीसाधन प्रयोग गर्न सकिने अर्को मार्ग पनि खोलिएको छ। विदुरबाट ढिकुरे, चौघडा, आप, नार्जा, लाच्याड, सर्मथले र पाटीखर्क हुँदै पासाङल्हामु राजमार्गको बोग्टीटारसम्म पुग्न सकिने प्राधिकरणको भनाइ छ। त्यसपछि कालिकास्थान र धुन्चेतर्फ जोडिने मार्ग उपलब्ध रहेको बताइएको छ।
गम्भीर प्रभावित क्षेत्र
प्राधिकरणका अनुसार रासुवाका उत्तरगया, गोसाईंकुण्ड, आमाछोदिङ्मो र कालिका तथा नुवाकोटका तारकेश्वर, किस्पाङ, विदुर र बेलकोटगढी गम्भीर प्रभावित क्षेत्रमा पर्छन्। यी क्षेत्रमा उद्धार, खोज तथा राहत सामग्री ढुवानीका लागि हेलिकोप्टरलाई प्राथमिकतामा राखिएको छ।
सीमित आपत्कालीन स्रोत विपद्का आधारभूत कार्यमा मात्र प्रयोग होस् भन्नका लागि सबै पक्षको सहयोग आवश्यक रहेको सूचनामा उल्लेख छ।
