महाकाली नदीमा पानीको बहाव आइतबार अपराह्नसम्म आइपुग्दा ६० हजार क्युसेक नजिक पुगेको छ। शनिबार बिहान शारदा ब्यारेजमा ३५ हजार क्युसेक रहेको बहाव दिनभरको वर्षापछि उल्लेखनीय रूपमा बढेको हो।
कञ्चनपुरका प्रमुख जिल्ला अधिकारी मदन कोइरालाका अनुसार पहाडी क्षेत्रमा लगातार भइरहेको वर्षाका कारण नदीको बहाव अझै बढ्न सक्ने सम्भावना छ। उनले तटीय क्षेत्रका बासिन्दालाई अत्यधिक सतर्कता अपनाउन र नदी किनारमा अनावश्यक आवतजावत नगर्न आग्रह गरेका छन्।
प्रशासनले माछा मार्ने, नदी तर्नेलगायत जोखिमयुक्त गतिविधि नगर्न सर्वसाधारणलाई अनुरोध गरेको छ। आवश्यक परे सुरक्षित स्थानतर्फ सर्न र कुनै पनि आपत्कालीन अवस्थामा स्थानीय प्रशासन वा सुरक्षा निकायलाई तत्काल जानकारी गराउन भनिएको छ।
महाकाली नदीको तटीय बस्ती तथा होचा भूभागमा निगरानी बढाइएको छ। स्थानीय तह, सुरक्षा निकाय र विपद् व्यवस्थापन संयन्त्रलाई तयारी अवस्थामा राखिएको प्रमुख जिल्ला अधिकारी कोइरालाले जानकारी दिए।
जल तथा मौसम विज्ञान विभागले साउन ३ देखि ५ गतेसम्म सुदूरपश्चिम प्रदेशका अधिकांश स्थानमा मध्यमदेखि भारी वर्षा हुने पूर्वानुमान गरेको छ। विभागका अनुसार निरन्तर वर्षाका कारण साना नदी, खोला तथा नालाहरूमा जलसतह अचानक बढ्न सक्ने, डुबान तथा कटानको जोखिम रहने भएकाले उच्च सतर्कता अपनाउन आग्रह गरिएको छ।
