काठमाडौं उपत्यकाको बागमती करिडोरमा हरियाली यतिबेला झनै आकर्षक देखिएको छ। थापाथली पुलदेखि तिलगंगासम्मको क्षेत्रको ड्रोन भिडिओमा नदी किनाराका दुवै भाग हराभरा र व्यवस्थित देखिएका छन्। बर्खाका कारण नदीमा पानीको सतह बढे पनि किनारामा रोपिएका रूखबिरुवा र पार्कहरूले सौन्दर्य बढाएको छ।
साउन ८ गते लगातारको वर्षापछि काठमाडौंको आकाश केही खुलेको थियो, जसले ड्रोनबाट खिचिएका तस्बिरलाई स्पष्ट बनाएको छ। नदीको पानी धमिलो भए पनि किनाराको हरियालीले शहरको मध्यभागमा रहेको यो करिडोरलाई जीवन्त बनाइदिएको छ।
सुकुमवासी हटेपछि खुला किनारा
पहिले थापाथली र तिलगंगाको बीचमा रहेका सुकुमवासी बस्तीहरू हटाइएपछि अहिले नदीको दुवै किनारा खुला र सफा छन्। त्यहाँ विकसित गरिएका हरियाली पार्कहरूले काठमाडौंको प्राकृतिक सौन्दर्यमा थप आकर्षण थपेको छ। ड्रोन भिडिओमा यी पार्कहरूको सुन्दरता स्पष्ट देखिन्छ।
अनलाइनखबरका फोटोपत्रकार कमल प्रसाईंले खिचेको यो ड्रोन दृश्यले बागमती करिडोरको हालको अवस्थालाई उजागर गरेको छ। नदीको दुवै किनारामा रहेको हरियालीले शहरको जीवनशैली र वातावरणमा सुधारको संकेत गरेको छ।
