काठमाडौं, भदौ १२। भोटेकोशी र त्रिशूली नदीमा आएको विनाशकारी बाढीबाट प्रभावित नागरिकलाई सहयोग गर्न नेपाल अटोमोबाइल्स एसोसिएसन (नासा नेपाल) अघि सरेको छ। संस्थाले प्रधानमन्त्री दैवी प्रकोप उद्धार कोषमा एक लाख रुपैयाँ सहयोग गर्ने घोषणा गरेको छ।
नासा नेपालले बाढीमा ज्यान गुमाएकाहरूप्रति श्रद्धाञ्जली अर्पण गर्दै शोकमा रहेका परिवारजनप्रति समवेदना प्रकट गरेको छ। साथै घाइते भएकाहरूको छिटो स्वास्थ्यलाभको कामना गर्दै बेपत्ता भएकाहरूको खोजी र उद्धारका लागि सबैलाई आ–आफ्नो ठाउँबाट सहयोग जुटाउन आग्रह गरेको छ।
संस्थाले जारी गरेको वक्तव्यमा राष्ट्रिय संकटको बेला नेपाल सरकारसँग ऐक्यबद्धता व्यक्त गर्दै उद्धार, उपचार र पुनःस्थापनाका काममा निजी क्षेत्र, खेलकर्मी तथा अटोमोबाइल समुदायलाई सक्रिय सहयोगका लागि अपिल गरिएको छ।
