काठमाडौं, १३ भदौ । कैलाश मानसरोवर यात्रा सकेर फर्किएका आध्यात्मिक गुरु जगदिश वासुदेव (सद्गुरु) तातोपानी नाका हुँदै काठमाडौं आइपुगेका छन् । त्रिभुवन अन्तर्राष्ट्रिय विमानस्थल स्रोतका अनुसार उनलाई आज सिम्रिक एयरको हेलिकप्टरमार्फत काठमाडौं ल्याइएको हो ।
बाढीका बेला मानसरोवर क्षेत्रमा रहेका सद्गुरु प्रभावित क्षेत्रमा पुगेका थिए । उनकै इशा फाउन्डेशनले सञ्चालन गर्दै आएको कैलाश मानसरोवर यात्राको एक टोली रसुवाको बाढीका क्रममा सम्पर्कविहीन भएको थियो ।
मानसरोवरबाट फर्किने क्रममा नेपाल–चीन सीमाबाट सम्पर्कविहीन भएको सो टोलीमा ८० तीर्थयात्री रहेका थिए । १० भदौको बाढीपछि सार्वजनिक गरिएको भिडियोमा सद्गुरुले सम्पर्कविहीन टोलीका सदस्य र उनीहरूको संख्याबारे जानकारी गराएका थिए ।
उनकाअनुसार सम्पर्कविहीन समूहमा अमेरिका, क्यानडा, अष्ट्रेलिया, बेलायत, जर्मनी, फ्रान्स र नेपालसहित २० मुलुकका नागरिक थिए । तीमध्ये ३४ पुरुष र ४६ महिला रहेको उनले बताएका थिए ।
सद्गुरु हरेक वर्ष नेपालको बाटो भई कैलाश मानसरोवर यात्रा गर्दै आएका छन् ।
