नेकपा एमालेका नेता विष्णु रिजालले गत वर्ष भदौ २३ गतेको जेनजी आन्दोलनलाई ‘राष्ट्रको छातीमा खिल बनेर बसेको दिन’ भन्ने अर्थमा व्याख्या गरेका छन्। उनले सो दिन भएको मानवीय क्षतिलाई सम्झँदै त्यसप्रति गहिरो संवेदना व्यक्त गरेका हुन्।
मंगलबार सामाजिक सञ्जालमा लेख्दै रिजालले सामाजिक सञ्जाल बन्दविरुद्ध जेनजी युवाहरूले आयोजना गरेको प्रदर्शन हिंसात्मक बनेको र केही मिनेटकै अवधिमा १९ जना युवाले ज्यान गुमाएको स्मरण गरे। उनका अनुसार आन्दोलनका क्रममा राष्ट्रका धरोहरमा समेत आगजनी भएको थियो।
प्रदर्शनकारीहरू संयमित हुन नसकेको र सरकार पनि विवेकयुक्त ढंगले अगाडि नबढेको उनको भनाइ छ। नेतृत्व हातबाट गए पनि राज्यसत्ता खाली नरहने तर ज्यान गुमाएका युवाहरूका आमाको काख भने कहिल्यै भरिन नसक्ने रिजालले बताए।
आन्दोलनका क्रममा ज्यान गुमाएका निर्दोष युवाहरूको बलिदानलाई सत्तामा पुग्ने सोपान बनाउनेहरूले नै उनीहरूलाई बिर्सिएको रिजालको टिप्पणी छ। ती अवोध युवालाई भर्याङ बनाएर सत्ता हाँसिल गर्नेहरूले उनीहरूलाई नसम्झिएको उनले उल्लेख गरे।
भदौ २३ को घटनामा ज्यान गुमाएका सबै युवाप्रति रिजालले हार्दिक श्रद्धाञ्जली व्यक्त गरेका छन्।
