काठमाडौं, भदौ २३ । भोटेकोशी बाढी प्रभावित क्षेत्रमा खोज तथा उद्धारका काम सहज बनाउन एनसेलले स्याटलाइटमार्फत निःशुल्क इन्टरनेट सेवा दिन थालेको छ। विपद्का बेला सञ्चार सञ्जाल ठप्प भए पनि यो प्रविधिबाट इन्टरनेट पहुँच कायम राख्न सकिन्छ।
कम्पनीले युटेलस्याटको लो अर्थ अर्बिट स्याटलाइटमा आधारित उपकरणहरू प्रभावित क्षेत्रका आवश्यक स्थानमा जडान गरिरहेको छ। उद्धार, राहत र पुनःस्थापनाका प्रयासमा संलग्न सरकारी निकायसँग समन्वय गरेर स्थान छनोट गरिएको हो। यो सेवा सञ्चालनका लागि नेपाल दूरसञ्चार प्राधिकरणलगायत सम्बन्धित निकायबाट स्वीकृति लिइसकिएको छ।
हालसम्म नुवाकोटका तीन महत्त्वपूर्ण स्थानमा सेवा पुर्याइएको छ। बाढी प्रभावित समुदाय, होल्डिङ सेन्टर, राहत वितरण केन्द्र, अस्थायी शिविर तथा आपत्कालीन कार्य हुने ठाउँहरूमा सेवा विस्तार भइरहेको छ।
जमिनमा राखिएको उपकरणले आकाशको स्याटलाइटबाट इन्टरनेट सिग्नल लिन्छ र वरपरका उपकरणहरूमार्फत वाईफाई सेवा उपलब्ध गराउँछ। साधारण मोबाइल तथा इन्टरनेट सेवा नचले पनि यसबाट उच्च गति र कम विलम्बता भएको जडान प्राप्त हुन्छ। सन्देश आदानप्रदान, इन्टरनेटमार्फत कल, ब्राउजिङ, आवश्यक जानकारीको पहुँच र राहत प्रयासको समन्वयमा यो प्रविधि उपयोगी हुनेछ।
एनसेलका प्रमुख कर्पोरेट तथा नियामक अधिकृत डिल्लीराम श्रेष्ठले नुवाकोटका तीन स्थानमा स्याटलाइट सञ्चार पहुँच स्थापना गरिएको जानकारी दिए। उनका अनुसार यसले उद्धार तथा राहतका कामलाई सहज बनाउनुका साथै प्रभावित स्थानीयवासीलाई कठिन समयमा आफन्त र सम्बन्धित निकायसँग सम्पर्कमा रहन मद्दत गर्नेछ।
यसैबीच, एनसेलले विपद्पछिको पहिलो दिनदेखि नै प्रभावित ३ लाखभन्दा बढी ग्राहकलाई दैनिक निःशुल्क भ्वाइस, डेटा र एसएमएस सेवा उपलब्ध गराइरहेको छ। साथै कम्पनीले एनसेल फाउन्डेसनमार्फत प्रधानमन्त्री दैवी प्रकोप उद्धार कोषमा उद्धार, राहत र पुनःस्थापना कार्यका लागि १ करोड रुपैयाँ सहयोग गरेको छ।
