मकवानपुरको मनहरी गाउँपालिकामा प्रहरीले ठूलो परिमाणमा अवैध लागूऔषध गाँजासहित दुई जनालाई नियन्त्रणमा लिएको छ। पूर्व-पश्चिम राजमार्ग हुँदै यात्रा गरिरहेको एक सवारी साधनबाट प्रहरीले १०९ किलोग्रामभन्दा बढी गाँजा बरामद गरेको हो।
पक्राउ पर्नेहरूमा धादिङ जिल्लाको गजुरी गाउँपालिका वडा नम्बर ७, किरण चोक निवासी ४१ वर्षीय सुमन तामाङ र १८ वर्षीय इरोज तामाङ रहेका छन्। विशेष सूचनाका आधारमा खटिएको प्रहरी टोलीले उनीहरूलाई नियन्त्रणमा लिएको हो।
जिपभित्र त्रिपालमुनि लुकाइएको गाँजा बरामद
चितवनबाट हेटौंडातर्फ जाँदै गरेको बा प्र ०१-०२६ च ४८९३ नम्बरको जिपलाई प्रहरीले मनहरी गाउँपालिका वडा नम्बर ८ स्थित सिम्पानीमा रोकेर खानतलासी गरेको थियो। जाँचका क्रममा जिपको पछाडिको भागमा त्रिपालले ढाकेर राखिएको अवस्थामा प्लास्टिकले बेरिएका १५ वटा प्याकेट फेला परेका थिए।
ती प्याकेटहरू खोलेर हेर्दा कुल १०९.०९६ किलोग्राम गाँजा बरामद भएको प्रहरीले जनाएको छ। प्रहरीले अवैध गाँजा र ओसारपसारमा प्रयोग गरिएको जिप नियन्त्रणमा लिएर यस घटनाका सम्बन्धमा थप कानुनी अनुसन्धान अगाडि बढाएको छ।
