लोकसेवा आयोग र राष्ट्रिय किताबखानाबीच सरकारी कर्मचारीहरूको व्यक्तिगत विवरण प्रविष्टिलाई सहज बनाउने उद्देश्यले प्रणालीगत अन्तर-आवद्धता विस्तार गरिएको छ। यससँगै अब लोकसेवा आयोगको सिफारिसमा नियुक्त हुने नयाँ कर्मचारीहरूको विवरण एक क्लिकमै राष्ट्रिय किताबखानाको प्रणालीमा स्वतः देखिने भएको छ।
मंगलबार (असार ३१ गते) लोकसेवा आयोगका सचिव रामेश्वर दंगालको उपस्थितिमा दुई निकायबीच यससम्बन्धी समझदारी पत्रमा हस्ताक्षर भएको हो। समझदारी पत्रमा राष्ट्रिय किताबखानाका महानिर्देशक श्रवण कुमार पोखरेल र लोकसेवा आयोगका सहसचिव पुरुषोत्तम शर्माले हस्ताक्षर गर्नुभएको छ। यस सम्झौतापश्चात दुवै निकायका प्रणालीहरू एकापसमा जोडिएर सूचनाको स्वतः आदानप्रदान हुने बाटो खुलेको छ।
प्रणाली एकीकरण र यसका फाइदाहरू
नयाँ व्यवस्था लागू भएसँगै कर्मचारीहरूले आफ्नो व्यक्तिगत विवरणहरू पटक-पटक प्रविष्ट गरिरहनुपर्ने झन्झटबाट मुक्ति पाउनेछन्। अब राष्ट्रिय किताबखानाको प्रणालीमा लोकसेवा आयोगको 'मास्टर आइडी' नम्बर प्रविष्ट गर्ने बित्तिकै सम्बन्धित कर्मचारीको सम्पूर्ण व्यक्तिगत विवरणहरू स्वतः प्रणालीमा प्रविष्ट हुनेछन्।
यसअघि कर्मचारीहरूले आफ्नो नाम, थर, बाबुबाजेको नाम, वैवाहिक स्थिति, स्थायी तथा अस्थायी ठेगाना, शैक्षिक योग्यता, नागरिकता नम्बर, नागरिकता जारी भएको मिति र जिल्ला जस्ता विवरणहरू पटक-पटक भर्नुपर्ने बाध्यता थियो। नयाँ प्रविधिको प्रयोगसँगै यो झन्झट पूर्ण रूपमा अन्त्य हुने विश्वास गरिएको छ।
इ-सिटरोल दर्ता सेवा थप प्रभावकारी बन्ने
राष्ट्रिय किताबखानाले लोकसेवा आयोगको सिफारिसमा नियुक्त हुने नयाँ कर्मचारीहरूलाई लक्षित गरी करिब तीन महिना अघिदेखि नै 'इ-सिटरोल रेजिष्ट्रेशन' सेवा सञ्चालनमा ल्याएको थियो। यस अन्तर्गत कर्मचारीहरूले आफ्नै मोबाइल, ल्यापटप वा डेस्कटप कम्प्युटर प्रयोग गरेर सजिलैसँग सिटरोल दर्ता गर्न, संकेत नम्बर प्राप्त गर्न र सिटरोल डाउनलोड गर्न सक्ने सुविधा पाउँदै आएका छन्।
किताबखानाका महानिर्देशक श्रवण कुमार पोखरेलका अनुसार हाल सञ्चालनमा रहेको 'इ-पेन्सन' सेवाको तुलनामा यो 'इ-सिटरोल रेजिष्ट्रेशन' सेवा अत्यन्तै लोकप्रिय देखिएको छ र लक्षित समूहका सबै कर्मचारीहरूले यसको उपयोग गरिरहेका छन्। नयाँ समझदारी पत्रको कार्यान्वयनसँगै यो सेवा प्रवाह अझ बढी सहज र प्रभावकारी बन्ने उहाँको भनाइ छ।
