भोटेकोशी बाढीपछि उद्धार र राहतमा दलहरू एकजुट

१२ भदौ, काठमाडौं । रसुवाको भोटेकोशी बाढीपछि सिर्जित मानवीय संकटसँग जुध्न देशका राजनीतिक दलहरू एकजुट भएका छन् । सत्तारुढदेखि प्रतिपक्षसम्मका दलहरूले आ–आफ्ना पार्टी पंक्तिलाई उद्धार र राहतमा खटाएका छन् । राजनीतिक मुद्दामा फरकधार बोकेका दलहरू विपद्को घडीमा भने साझा जिम्मेवारी बोध गर्दै प्रभावित क्षेत्रमा सक्रिय देखिएका छन् ।

रास्वपाको ‘र्याट’ उद्धार र राहतमा

सत्तारुढ दल रास्वपाले आफ्नो विपद् व्यवस्थापन संयन्त्र ‘र्यापिड एक्सन टिम’ (र्याट) मार्फत उद्धार र राहत कार्यलाई तीव्रता दिएको छ । पार्टीका महामन्त्री विपिनकुमार आचार्यले १० भदौमा विज्ञप्ति जारी गर्दै केन्द्रदेखि स्थानीय तहसम्मका समिति, सदस्य तथा शुभेच्छुकलाई स्थानीय प्रशासन र सुरक्षा निकायसँग समन्वय गरेर परिचालन हुन निर्देशन दिएका थिए ।

र्याटका पूर्वसंयोजक आशिष थापालाई उद्धार र राहतको संयोजन जिम्मा दिइएको छ । थापाले आधिकारिक जिम्मेवारी सम्हाल्नुअघि नै बुधबार दिउँसो टोलीसहित नुवाकोट पुगेको बताए । उनका अनुसार स्थानीय प्रशासन र प्रहरीसँग समन्वय गरेर टोली त्रिशूलीतिर अघि बढिसकेको थियो । बिहीबार रसुवाको मैलुङस्थित सेते ओडारबाट एकै दिन करिब अढाई सय जनाको उद्धार गरिएको उनले जानकारी दिए । ‘र्याट’ले हालसम्म झण्डै ६०० जनाको उद्धार गरिसकेको छ ।

उद्धार गरिएकाहरूलाई नुवाकोटका पाँच वटा सेल्टरमा राखिएको र त्यहाँ झण्डै ५०० जनाको खाना तथा बसोबासको व्यवस्था गरिएको छ । थापाले केहीलाई बस मार्फत काठमाडौं पठाउने काम पनि अघि बढेको बताए । बिहीबार रास्वपाका सांसदहरू औषधि, पीपीई, ग्लोब्सलगायत स्वास्थ्य सामग्री बोकेर प्रभावित क्षेत्रमा पुगेका थिए । उनले राहत सामग्री व्यवस्थापनका लागि एकद्वार प्रणाली लागू गर्न प्रमुख जिल्ला अधिकारी, प्रहरी र सुरक्षा निकायसँग समन्वय भइरहेको जानकारी दिए ।

कांग्रेसको समन्वय समिति र राहत संकलन

प्रमुख प्रतिपक्षी नेपाली कांग्रेसले ‘रसुवा बाढी विपद् व्यवस्थापन समन्वय तथा सहजीकरण समिति’ गठन गरेको छ । रसुवाका सांसद तथा केन्द्रीय सदस्य मोहन आचार्यको संयोजकत्वमा गठित समितिमा बाढी प्रभावित रसुवा, नुवाकोट, धादिङ, गोरखा, तनहुँ, चितवन र नवलपुरका केन्द्रीय पदाधिकारी तथा सदस्य, सांसद, प्रदेशसभा सदस्य र स्थानीय तहका प्रमुख–उपप्रमुखलाई समेटिएको छ ।

महामन्त्री प्रदीप पौडेलले समितिले उद्धार, राहत र व्यवस्थापनमा समन्वय गरिरहेको बताए । पार्टीले सरकारको राहत कोषमा एकमुष्ट रकम जम्मा गर्ने उद्देश्यले सांसद तथा जनप्रतिनिधिहरूको तलबबाट सहयोग जुटाउने गरी आन्तरिक परिपत्र जारी गरेको छ । कांग्रेसले केन्द्रीय कार्यालयमा सूचना तथा समन्वय डेस्कसमेत स्थापना गरेको छ ।

कांग्रेस केन्द्रीय कार्यसमितिको बैठकले पार्टी पदाधिकारी र प्रभावित क्षेत्रका केन्द्रीय सदस्यहरूलाई अन्य कार्यक्रममा नलागी उद्धार, राहत र व्यवस्थापनमै केन्द्रित रहने निर्णय गरेको छ । पार्टीको भ्रातृ संगठन नेपाल तरुण दलले शुक्रबारदेखि काठमाडौंका नयाँ बानेश्वर, कोटेश्वर, चाबहिल र ठमेलमा राहत सामग्री संकलन अभियान थालेको छ । तरुण दलका पूर्वकेन्द्रीय सदस्य रमेश खड्काका अनुसार अभियानमा खाद्यान्न र लत्ताकपडा मात्र संकलन गरिनेछ, नगद भने लिइने छैन ।

एमालेको उच्चस्तरीय टोली प्रभावित क्षेत्रमा

नेकपा एमालेका अध्यक्ष केपी शर्मा ओलीले १० भदौमा विज्ञप्ति जारी गर्दै नेता, कार्यकर्ता, जनसंगठनका सदस्य र जनप्रतिनिधिलाई प्रभावित क्षेत्रमा तत्काल खोज, उद्धार र राहतमा परिचालन हुन निर्देशन दिएका थिए । पार्टीका कार्यालय सचिव डा. भीष्म अधिकारीका अनुसार आकस्मिक बैठकले उद्धार र राहतका लागि पार्टी पंक्ति परिचालन गर्ने निर्णय गरेको छ । महासचिव शंकर पोखरेल नेतृत्वको उच्चस्तरीय टोली बिहीबार नुवाकोटको त्रिशूली क्षेत्रको निरीक्षण गरेर फर्किएको छ ।

एमालेले अनेरास्ववियु, युवा संघलगायत भ्रातृ संगठनका सदस्यहरूलाई पनि प्रभावित क्षेत्रमा खटाएको छ । पार्टी नेतृत्वको बागमती प्रदेश सरकारका मुख्यमन्त्री किरण थापा मगर आफैं प्रभावित क्षेत्रमा पुगेर बसेका छन् । स्थानीय पार्टी पंक्ति परिचालित भइसकेको र थप जनशक्ति पठाउन आवश्यक तयारी भइरहेको एमालेले जनाएको छ ।

माओवादी केन्द्र, जसपा नेपाललगायत अन्य दल

नेकपा (माओवादी केन्द्र) का संयोजक पुष्पकमल दाहाल ‘प्रचण्ड’ले १० भदौमा सामाजिक सञ्जालमार्फत पार्टी पंक्तिलाई प्रभावित क्षेत्रमा उद्धार, राहत र मानवीय सेवामा जुट्न तथा स्थानीय प्रशासनसँग समन्वय गर्न निर्देशन दिएका थिए । बिहीबार रास्वपा अध्यक्ष रवि लामिछानेले बोलाएको सर्वपक्षीय बैठकमा प्रचण्डले विपत्तिका बेला राजनीतिक मतभेद थाती राखेर राष्ट्र र नागरिकको पक्षमा उभिनुपर्नेमा जोड दिएका थिए ।

जसपा नेपालले पनि आफ्ना नेता–कार्यकर्तालाई बाढी प्रभावित क्षेत्रमा परिचालन गरेको जनाएको छ । अध्यक्ष उपेन्द्र यादवका अनुसार कोही घटनास्थलमा खटिएका छन् भने कोही राहत संकलन र स्वास्थ्य सहयोगमा लागेका छन् । मधेश केन्द्रित तथा पहिचानवादी दलहरूको ‘अग्रगामी मोर्चा’बाट पनि उद्धार र राहतका प्रयास जारी रहेको उनले बताए ।

आम जनता पार्टीले युवाको टोलीलाई प्रभावित क्षेत्रमा पठाएको छ । अध्यक्ष प्रभु साहले विकेश साहको नेतृत्वमा रहेको ‘जेनजी’ टोली र आईटी आर्मीलाई सरकार तथा सुरक्षा निकायसँग समन्वय गरेर आवश्यक सहयोग गर्न निर्देशन दिइएको बताए ।

राष्ट्रिय प्रजातन्त्र पार्टी (राप्रपा) ले सबै तहका नेता–कार्यकर्ता र शुभेच्छुकलाई स्थानीय प्रशासनसँग समन्वय गर्दै उद्धार, राहत र मानवीय सहयोगमा सक्रिय हुन आह्वान गरेको छ । प्रवक्ता मोहन श्रेष्ठले प्रभावित क्षेत्रका पार्टी कमिटीलाई उद्धारमा खटिन र राहत संकलनमा सहयोग गर्न भनिएको जानकारी दिए ।

श्रम संस्कृति पार्टीले पनि बाढी प्रभावित क्षेत्रमा आफ्ना नेता–कार्यकर्ता खटाएको छ । पार्टीका सांसद आरेन राई आफैं प्रभावित क्षेत्रमा पुगेका छन् । राहत संकलन र उद्धारका काममा दलहरूको सक्रियता यथावत् छ ।