लगातार परेको वर्षाका कारण आएको बाढी र पहिरोले रसुवासहित देशका विभिन्न जिल्लाका प्रमुख सडक तथा राजमार्गमा यातायात सेवा प्रभावित भएको छ। सडक विभागका अनुसार इलाम, काभ्रेपलाञ्चोक, मकवानपुर, रसुवा र नुवाकोटका विभिन्न सडकखण्ड हाल अवरुद्ध अवस्थामा छन्।
नुवाकोटको शिवपुरी गाउँपालिका–५ घडेरीखोला क्षेत्रमा टोखा–छहरे सडकखण्ड पहिरोका कारण प्रभावित भएको छ। त्यस्तै, मकवानपुरको हेटौँडा–टिङ्गन–बागमती–ललितपुर सडकखण्डमा सम्भावित बाढी र पहिरोको जोखिम रहेकाले सवारी आवागमन बन्द गरिएको छ।
प्रहरीले लगातारको वर्षा, बाढी र पहिरोका कारण सडकमा जुनसुकै बेला अवरोध आउन सक्ने जनाउँदै यात्रा गर्नुअघि सडकको अवस्थाबारे जानकारी लिन आग्रह गरेको छ। साथै, जोखिमयुक्त क्षेत्रमा यात्रा गर्दा आवश्यक सावधानी अपनाउन पनि प्रहरीले अनुरोध गरेको छ।
