काठमाडौं, अगस्ट ३०। विश्व स्वास्थ्य संगठन (WHO) ले नेपालका भीषण बाढी प्रभावित समुदायको तत्कालीन स्वास्थ्य आवश्यकता पूरा गर्नका लागि दक्षिण-पूर्वी एसिया क्षेत्रीय स्वास्थ्य आपत्कालीन कोष (SEARHEF) बाट १५०,००० अमेरिकी डलर जारी गरेको छ।
WHO दक्षिण-पूर्वी एसिया क्षेत्रीय कार्यालयका प्रभारी अधिकृत डा. निलेश बुद्धका अनुसार यो रकम तत्कालीन प्रतिक्रियाका प्राथमिकताहरूमा खर्च गरिनेछ। उनले नेपालको बाढीपछिको राहत तथा पुनर्स्थापना प्रयासमा WHO प्रतिबद्ध रहेको बताएका छन्।
अगस्ट २६ मा आएको बाढीपछि केही घण्टाभित्रै WHO ले करिब १०,००० जनाको तीन महिने स्वास्थ्य आवश्यकता पूरा गर्न सक्ने अन्तर-एजेन्सी आपत्कालीन स्वास्थ्य किट र बहुउद्देश्यीय पालसहित अत्यावश्यक चिकित्सा सामग्री पठाइसकेको थियो। पछि प्रभावित क्षेत्रको आवश्यकताका आधारमा सर्जिकल मास्क, पन्जा, ह्यान्ड सेनिटाइजर र अन्य चिकित्सा सामग्रीसमेत उपलब्ध गराइएको संगठनले जनाएको छ।
राष्ट्रिय अधिकारीहरूको तथ्यांक उद्धृत गर्दै WHO ले बाढीका कारण ७३० भन्दा बढीको मृत्यु भएको, करिब २,५०० जना बेपत्ता भएको र २०० भन्दा बढी घाइते भएको जानकारी दिएको छ। हाल ७४ जनाको उपचार भइरहेको छ।
बागमती र गण्डकी प्रदेशका छ जिल्लाका करिब १०,००० घरधुरीलाई तत्काल राहत आवश्यक रहेको छ। यसैगरी धेरै स्वास्थ्य संस्थाहरू क्षतिग्रस्त भएका छन्। रसुवाका चार वटा स्वास्थ्य संस्था पूर्ण रूपमा क्षतिग्रस्त भएका छन् भने धादिङका दुई वटा आंशिक रूपमा क्षतिग्रस्त भएका छन्। सडक क्षतिग्रस्त हुँदा धादिङ र त्रिशूलीका अस्पतालसम्म पुग्नसमेत कठिन भएको छ।
WHO ले नेपाल सरकार र अन्य साझेदारहरूसँग समन्वय गर्दै रोग निगरानी सुदृढ गर्ने, आवश्यक स्वास्थ्य सेवा कायम राख्ने र चोटपटक, झाडापखाला, श्वासप्रश्वाससम्बन्धी रोग, पानी तथा खानाजन्य रोग र लामखुट्टेबाट सर्ने रोगजन्य जोखिमलाई सम्बोधन गर्ने कार्य भइरहेको जनाएको छ। संगठनका अनुसार विस्थापन, परिवारका सदस्य, घर र जीविकोपार्जनको क्षतिले प्रभावित समुदायको मानसिक स्वास्थ्य र मनोसामाजिक अवस्थामा पनि गम्भीर असर पार्न सक्छ।
