कांग्रेस सभापति गगन थापाले पार्टीको आधिकारिता प्राप्तिका सन्दर्भमा कुनै आर्थिक कारोबार वा अनुचित काम नभएको स्पष्ट पार्दै इनम सापकोटाका नाममा चर्चामा आएको अडियोको सत्यताबारे निष्पक्ष अनुसन्धान गर्न माग गरेका छन् । बिहीबार सार्वजनिक भिडियो सन्देशमा उनले यी दुवै विषयमा आफ्नो पक्ष राखेका हुन् ।
पार्टीको वैधता लिने विषयलाई राजनीतिक तथा कानुनी लडाइँका रूपमा लिइएको उल्लेख गर्दै थापाले त्यसमा एक पैसा पनि रकमको लेनदेन नभएको बताएका छन् । उक्त अडियोका आधारमा सार्वजनिक रूपमा जवाफ दिनु आवश्यक नभए पनि विषय यतिमै टुंगिएको भने उनको भनाइ छैन । अब प्रश्न आफूलाई नभई जिज्ञासा राख्नुपर्ने ठाउँमा सोध्नुपर्ने र यसमा पत्रकारिता क्षेत्र तथा अन्य चासो राख्ने पक्षको पनि उत्तिकै जिम्मेवारी रहेको उनले औंल्याएका छन् ।
सरकारी पक्षतर्फको संकेत
थापाले प्रतिपक्षको आवाज निस्तेज पार्ने उद्देश्यले यस्ता हल्ला सरकारी पक्षबाटै बाहिर ल्याइएको आशय व्यक्त गरेका छन् । लोकतान्त्रिक अधिकार खुम्च्याइँदै र संस्थाहरू कमजोर बनाइँदै गर्दा आफूहरू मौन दर्शक बनेर नबस्ने उनको भनाइ छ ।
आफूहरूले प्रश्न उठाएपछि मात्र यस्ता हल्ला बाहिर आएको तर्फ संकेत गर्दै उनले त्यसबाट प्रश्न गर्ने क्रम नरोकिने बताएका छन् । गलत विषयको प्रतिवाद गर्ने र जिज्ञासा राख्ने अधिकार निरन्तर कायम रहने उनले उल्लेख गरेका छन् ।
