धादिङको गजुरी गाउँपालिका–२ स्थित पृथ्वी राजमार्गको परेवाभिर सडक खण्ड आइतबार पनि १२ घण्टासम्म सवारी आवागमनका लागि पूर्ण रूपमा बन्द हुने भएको छ। जिल्ला प्रशासन कार्यालय धादिङले बिहान ६ बजेदेखि बेलुका ६ बजेसम्म उक्त खण्ड बन्द गरेर सडक मर्मतको काम गर्न लागिएको जानकारी दिएको छ।
रसुवाको भोटेकोशीमा भदौ १० गते आएको बाढीले परेवाभिर क्षेत्रको सडकमा क्षति पुर्याएपछि राजमार्गको यो खण्ड एकतर्फी मात्र सञ्चालन हुँदै आएको थियो। क्षतिग्रस्त सडकको मर्मतका लागि शनिबार पनि दिनभर आवागमन रोकेर काम गरिएको थियो। मर्मतको काम सम्पन्न नभएकाले आइतबार पनि सोही अवधिमा सडक पूर्ण रूपमा बन्द गरेर कामलाई तीव्रता दिइएको प्रशासनले जनाएको छ।
मर्मत अवधिभर एम्बुलेन्स र शववाहनबाहेक अन्य सम्पूर्ण सवारीसाधनको सञ्चालनमा रोक लगाइएको छ। सडक बन्द हुँदा यात्रु तथा सवारीचालकलाई पर्न सक्ने असुविधाप्रति प्रशासनले क्षमा माग्दै उक्त समयमा वैकल्पिक मार्ग प्रयोग गरी यात्रा गर्न सबैमा आग्रह गरेको छ।
