अमेरिकी राष्ट्रपति डोनाल्ड ट्रम्पले पूर्व कोभिड-१९ महामारी समन्वयक डा. एन्थोनी फाउचीको बेसबल कौशलको उपहास गरेका छन्। फाउची बुधबार सेनेट होमल्यान्ड सेक्युरिटी एन्ड गभर्नमेन्टल अफेयर्स समितिमा बयान दिन तय भएको केही घण्टा अघि ट्रम्पले ट्रुथ सोसियलमा एउटा भिडियो साझा गर्दै फाउची ‘बनावटी’ रहेको आरोप लगाए।
ट्रम्प (८०) ले फाउची (८५) लाई ‘भयानक एथलीट’ भन्दै भने, ‘यो मैले वर्षौंमा देखेको सबैभन्दा खराब फ्याँक हो।’ उनले जुलाई २०२० मा मेजर लिग बेसबलको सीजन ओपनरमा फाउचीले गरेको सेरेमोनियल फस्र्ट पिचलाई उद्धृत गर्दै ‘उनी सबै कुरामा जस्तै खेलमा पनि बनावटी रहे’ भनी टिप्पणी गरे।
फाउचीको सेनेट उपस्थिति
डा. फाउची, जो राष्ट्रिय एलर्जी तथा संक्रामक रोग संस्थान (एनआइएआइडी) का पूर्व निर्देशक हुन्, बुधबार बिहान सेनेट समितिमा बयान दिने कार्यक्रम छ। उनी ट्रम्पको पहिलो कार्यकालमा राष्ट्रपतिका अप्रमाणित सार्वजनिक स्वास्थ्य धारणाहरूको प्रतिरोध गरेपछि ट्रम्पको क्रोधको पात्र बनेका थिए।
समितिका अध्यक्ष सेनेटर र्यान्ड पलले मंगलबार सार्वजनिक गरेका हजारौं पृष्ठका डायरी प्रविष्टिहरूको पृष्ठभूमिमा फाउचीको बयान हुँदैछ। पलले एक्समा लेखेका छन्, ‘यदि एन्थोनी फाउची भोलि मेरो समितिमा आएर झूठो बकपत्र गरे भने, जो बाइडेनको पूर्वमाफीले उनलाई बचाउने छैन।’
फाउची ती व्यक्तिहरूमध्ये एक हुन् जसलाई पूर्वराष्ट्रपति जो बाइडेनले आगामी ट्रम्प प्रशासनबाट सम्भावित आक्रमणबाट जोगाउन कार्यालय छाड्नुअघि पूर्वमाफी जारी गरेका थिए। बाइडेनले त्यतिबेला भनेका थिए कि माफीलाई ‘कुनै व्यक्तिले गल्ती गरेको स्वीकारको रूपमा बुझ्नु हुँदैन’ र उनीहरू ‘अन्यायपूर्ण तथा राजनीतिक रूपमा प्रेरित अभियोजनको लक्ष्य बन्न योग्य छैनन्।’
