रोल्पा, १३ भदौ । कामको सिलसिलामा रसुवा पुगेका रोल्पाका २८ जनामध्ये २४ जना अहिलेसम्म सम्पर्कविहीन छन् । तिब्बततर्फबाट आएको बाढी रसुवाको भोटेकोशी नदीमा पसेपछि उनीहरूको सम्पर्क खुल्न सकेको छैन ।
जिल्ला प्रशासन कार्यालय रोल्पाका अनुसार कामको सिलसिलामा रसुवा पुगेकामध्ये चार जना भने सम्पर्कमा आएका छन् । सम्पर्कमा आउनेमा स्थायी ठेगाना नखुलेको दिलिजा पुन, रुन्टिगढी गाउँपालिका–८ का ध्रुवबहादुर बुढामगर, थबाङ गाउँपालिका–२ का नवराज रोकामगर र रोल्पा नगरपालिका–२ का रमेश वली छन् । प्रमुख जिल्ला अधिकारी गंगाबहादुर क्षेत्रीले चार जना सम्पर्कमा आएको जानकारी प्राप्त भएको बताएका छन् ।
सम्पर्कविहीनको विवरण
प्रशासनको विवरणअनुसार सुनिलस्मृति गाउँपालिकाका १० जना सम्पर्कविहीन छन् । सुनिलस्मृति–६ का रविलाल भण्डारी, राजेन्द्र महत, कुमार महरा, बसन्त महरा र सन्जु महत, सुनिलस्मृति–५ का हरि बहादुर घर्ती, आर्यन घर्ती, अनाराम पुन र सोम बहादुर घर्ती तथा सुनिलस्मृति–३ का जक्त हादुर पुन मगर सम्पर्कविहीन सूचीमा छन् ।
यस्तै, रोल्पा नगरपालिका–१० का लेखराज रोका, माडी गाउँपालिका–५ की तिला बाँठा मगर, माडी–३ की दीपा घर्ती मगर र गंगादेव गाउँपालिका–२ की कमला पुन मगर पनि सम्पर्कविहीन छन् ।
परिवर्तन गाउँपालिका–६ का कुलप्रसाद बुढामगर, मीना घर्ती मगर, डिपी बुढामगर र खुसी बुढामगर, सुनछहरी गाउँपालिका–५ का सुनिल विक तथा रुन्टीगढी गाउँपालिका–८ का गीता बस्नेत, हस्तबहादुर बस्नेत, गोपाल पुन, गोपाल परियार र विकास परियार पनि सम्पर्कविहीन छन् ।
सहायक प्रमुख जिल्ला अधिकारी घनश्याम गौतमले प्रशासनमा बेपत्ता तथा सम्पर्कविहीन हुने २६ जनाको विवरण मात्र उपलब्ध रहेको जानकारी दिए । उनका अनुसार खोज तथा उद्धारका क्रममा स्थायी ठेगाना नखुलेकी दिलिजा पुन र रोल्पा नगरपालिका–२ का रमेश वली समेत सम्पर्कमा आएका हुन् ।
सम्पर्कविहीन परिवारका सदस्यहरूले उनीहरू जीवितै फेला पर्ने आशा भने मारिसकेका छन् । परिवर्तन गाउँपालिका–६ का भीमप्रकाश बुढामगरका एकै परिवारका चार जना सदस्य सम्पर्कविहीन छन् । उनले जीवितै भेटिने आशा मारिसकेको र अब लास मात्र भेटिए पुग्ने बताएका छन् ।
