मौसम पूर्वानुमान महाशाखाले आइतबार कर्णाली र सुदूरपश्चिम प्रदेशका पहाडी क्षेत्रमा अति भारी वर्षाको सम्भावना रहेको जनाएको छ। हाल देशभर मनसुनको प्रभाव कायम छ र मनसुनको न्यून चापीय रेखा पश्चिममा सामान्य अवस्थिभन्दा केही उत्तरतिर तथा पूर्वमा सामान्य स्थितिमा रहेको महाशाखाले बताएको छ।
महाशाखाका अनुसार कोशी, बागमती र गण्डकीका हिमाली तथा पहाडी क्षेत्र, कर्णालीको पहाडी भेग र लुम्बिनी तथा सुदूरपश्चिमका पहाडी तथा तराई क्षेत्रका एक–दुई स्थानमा भारी वर्षाको सम्भावना छ। यस्तै, हिमाली र पहाडी क्षेत्रका धेरै स्थान तथा बागमती, गण्डकी, लुम्बिनी र सुदूरपश्चिमका अधिकांश तराई भेगमा चट्याङसहित मध्यम वर्षा हुन सक्ने पूर्वानुमान छ।
सोमबार रातिको पूर्वानुमानअनुसार कोशी, बागमती, गण्डकी र लुम्बिनीका हिमाली तथा पहाडी क्षेत्रका केही स्थानमा चट्याङसहित मध्यम वर्षा वा हिमपातको सम्भावना रहेको छ। कर्णाली र सुदूरपश्चिमका केही ठाउँमा पनि वर्षाको सम्भावना छ। कोशीका पहाडी र तराई क्षेत्र तथा बागमतीका पहाडी भेगका एक–दुई स्थानमा भारी वर्षा हुन सक्ने बताइएको छ।
वर्षाका बीच पनि जनकपुर देशकै सबैभन्दा तातो सहर बन्ने अनुमान छ, जहाँ अधिकतम तापक्रम ३५–३७ डिग्री सेल्सियस पुग्न सक्छ। सिमरामा ३४–३६ डिग्री सेल्सियस र नेपालगन्ज, भैरहवा, विराटनगर तथा धरानमा ३५ डिग्री सेल्सियससम्म तापक्रम पुग्न सक्ने महाशाखाले जनाएको छ।
काठमाडौंमा अधिकतम तापक्रम २८–३० डिग्री सेल्सियस रहने र आइतबार तथा सो रात ६० प्रतिशत वर्षाको सम्भावना रहेको छ। पोखरामा भने आइतबार ७० प्रतिशत वर्षाको सम्भावना छ, जहाँ तापक्रम २९–३१ डिग्री सेल्सियस रहनेछ। डडेलधुरा र दिपायलमा आइतबार ७० प्रतिशत वर्षाको सम्भावना रहेको छ। जोमसोममा कम वर्षा हुने तथा दिउँसो २२–२४ डिग्री र राति १३–१५ डिग्री सेल्सियस तापक्रम रहने पूर्वानुमान छ।
