बुकायो साकाको ह्याट्रिकको बलमा इंग्ल्यान्डले फ्रान्सलाई ६–४ ले हराउँदै विश्वकप २०२६ को तेस्रो स्थान हासिल गरेको छ। आइतबार मियामीमा भएको प्रतिस्पर्धामा इंग्ल्यान्डले पहिलो पटक विश्वकपको तेस्रो स्थानको खेल जितेको हो। यसअघि सन् २०१८ मा बेल्जियम र सन् १९९० मा इटालीसँग इंग्ल्यान्डले हार बेहोरेको थियो।
खेलको तेस्रो मिनेटमा कप्तान डेक्लेन राइसले गोल गर्दै इंग्ल्यान्डलाई अग्रता दिलाए। एजरी कोन्साले १८ औं मिनेटमा दोस्रो गोल थपे। साकाले ३७ औं मिनेटमा पहिलो र इन्जुरी समयको पहिलो मिनेटमा दोस्रो गोल गर्दै इंग्ल्यान्डलाई ४–० को अग्रता दिलाए।
दोस्रो हाफमा फ्रान्सले फर्कने प्रयास गर्यो। किलियन एमबापेले ४८ र ६८ औं मिनेटमा गोल गरे। ब्राडली बारकोलाले ५४ औं मिनेटमा एक गोल थपे। तर साकाले ८७ औं मिनेटमा पेनाल्टीबाट गोल गर्दै ह्याट्रिक पूरा गरे। इन्जुरी समयको छैटौं मिनेटमा ओसमन डेम्बेलेले गोल गरे पनि जुड बेलिंघमले त्यसको दुई मिनेटपछि इंग्ल्यान्डको छैटौं गोल गरेर खेल सकिएको सुनिश्चित गरे।
हारका बावजुद फ्रान्सका कप्तान एमबापेले दुई गोल गर्दै यस विश्वकपमा आफ्नो गोल संख्या १० पुर्याए। उनी गोल्डेन बुटको प्रमुख प्रत्यासी बनेका छन्। एमबापेले अर्जेन्टिनाका लियोनल मेसीलाई उछिनेका छन्, जसले आठ गोल गरेका छन्। विश्वकप इतिहासमा एमबापेको कुल गोल संख्या २२ पुगेको छ।
