पश्चिम चितवनको बस्तीमा पसेर त्रास फैलाइरहेको चितुवालाई नियन्त्रणमा लिन डिभिजन वन कार्यालयले दुई ठाउँमा खोर राखेको छ। सूचना अधिकारी देवीप्रसाद पौडेलका अनुसार भरतपुर महानगरपालिका–१५ गोपालचोकमा रहेको अविनाश पोल्ट्री फर्ममा एउटा र त्यसको करिब एक किलोमिटर दूरीमा अर्को खोर राखिएको हो।
चितुवाले मानव बस्तीमा छिरेर स्थानीयलाई त्रसित बनाएपछि खोर राख्नुपरेको पौडेलले बताए। तर हालसम्म कुनै पनि खोरमा चितुवा नपरेको उनको भनाइ छ।
खोरमा कुकुरको प्रयोग
चितुवालाई खोरतर्फ आकर्षित गर्नका लागि खोरभित्र कुकुर राखिएको छ। यसअघि सोही क्षेत्रबाट चितुवाको बच्चा नियन्त्रणमा लिइएको थियो। त्यस बच्चालाई सौराहा लगेर खोरमा राखिएको छ।
क्षेत्रमा माउ र बच्चा रहेको आकलन
यस क्षेत्रमा अझै एउटी माउ र एउटा बच्चा रहेको बताइएको छ। चितुवाको सम्भावित गतिविधिलाई मध्यनजर गर्दै वन कार्यालयले निगरानी बढाएको छ।
