गोरखाको बारपाक सुलिकोट गाउँपालिकाले भोटेकोशी बाढीबाट प्रभावितहरूको उद्धार तथा राहतका लागि २८ लाख ५९ हजार रुपैयाँ सहयोग गर्ने भएको छ। गाउँपालिकाका जनप्रतिनिधि, कर्मचारी तथा सामुदायिक विद्यालयका शिक्षक-कर्मचारीको तहगत पारिश्रमिक रकम राहत कोषमा जम्मा गरिने जनाइएको छ।
गाउँपालिका अध्यक्ष विष्णु भट्टका अनुसार अध्यक्ष र उपाध्यक्षले ७ दिनको तथा अन्य सबै जनप्रतिनिधिले ५ दिनको पारिश्रमिक राहत कोषमा जम्मा गर्नेछन्। कर्मचारीतर्फ अधिकृत स्तरका कर्मचारीको ७ दिन, सहायक स्तरका कर्मचारीको ५ दिन र श्रेणीविहीन कर्मचारीको २ दिनको पारिश्रमिक समेत सोही कोषमा जम्मा हुनेछ।
यस्तै, सामुदायिक विद्यालयमा कार्यरत शिक्षक तथा कर्मचारीको हकमा तोकिएअनुसार ७, ५ र २ दिनको पारिश्रमिक राहत कोषमा जम्मा गरिने व्यवस्था गरिएको छ। विद्यालय सहायक, बालविकास सहजकर्ता, सामुदायिक सिकाइ केन्द्रका सहजकर्ता र विद्यालय सहयोगीहरूले २ दिनको पारिश्रमिक रकम जम्मा गर्नेछन्।
भोटेकोशी बाढीपछि बारपाक सुलिकोट गाउँपालिकाका ६ जना सम्पर्कविहीन भएका छन्। उनीहरूको खोज तथा उद्धारमा समन्वय भइरहेको गाउँपालिकाले बताएको छ। सोही क्रममा गाउँपालिकाले सम्पर्कविहीन नागरिकको परिवारलाई ३५ हजार रुपैयाँ नगद उपलब्ध गराउने भएको छ।
