जनैपूर्णिमा तथा रक्षाबन्धनको अवसरमा आज पाटनको कुम्भेश्वर मन्दिर परिसरमा भक्तजनको विशेष भीड लागेको छ। वर्षैपिच्छे यस दिन यहाँ मेला लाग्ने गरेकाले पनि श्रद्धालुको आकर्षण बढी देखिन्छ।
मन्दिरभित्र दर्शन र पूजाका लागि पङ्क्तिबद्ध भएर पर्खनेहरू छन् भने मन्दिर परिसरमै रक्षासूत्र बाँध्ने, जनै फेर्ने र विधिपूर्वक स्नान गर्ने क्रम पनि चलेको छ। कुण्ड तथा धाराको वरिपरि नुहाउने भक्तजनको भीड छ।
मन्दिर परिसरको तलाउमा केही युवाले पौडी खेल्दै रमाइलो गरेको देखिन्छ। धार्मिक मेलामा आउनेहरूको भीडलाई मध्यनजर गर्दै सुरक्षा तथा लाइन व्यवस्थापनमा प्रहरी परिचालन गरिएको छ।
किम्वदन्तीअनुसार भगवान् श्रीरामले बाण प्रहार गरेर गोसाइँकुण्डको जल कुम्भेश्वरको कुण्डसम्म ल्याइएको थियो। यही धार्मिक विश्वासका कारण जनैपूर्णिमाका दिन कुम्भेश्वरमा स्नान गर्न देशका विभिन्न स्थानबाट भक्तजन आउने गर्छन्।
